高陽科技（818）潛三年底，單係揸住百富環球（327）應佔權益市值，幾乎等於本身市值，集團嚟自百富環球肥仔增值未反映之餘，本身另揸住23億元淨現金，超級現金牛。高陽現水位有得諗。
高陽揸百富環球3.64億股或32.7%，應佔百富環球權益市值近24億元，高陽現價1.16元，潛喺三年底，家陣總市值都係得32億元。又百富環球上年曾經見過14蚊高位，家陣累跌50%過外，就算喺一年底，粗略計兼簡單講，百富環球為高陽帶嚟股本增值，都講緊達到10.74億元，或高陽每股0.39元。
仲未止。後邊百富環球，主打電子支付終端解決方案，兼食正環球熱，而第一季收入，就同比增加咗13%，到6.7億元。講基本面，有上升條件。
又深港通越嚟越近磅，百富環球又係恒指小型成份股之一，港股通擴容，百富環球又係熱門股之一，若果真係獲納入，高陽有同氣連枝concept之餘，嚟緊日子，高陽亦keep住有嚟自百富環球嘅肥仔股本增值。
高陽到上年尾揸淨現金23億元，係家陣總市值72%，超級現金牛。呢轉煲高陽，當只係反映家陣百富環球帶嚟每股0.39元增值，高陽要見1.54元，現價講緊要升34%，高陽PB仲喺1倍樓下。
